Martxoaren 15ean Bizkaia Cup Gomazko Paleta Txapelketa irabazi zuten Andere Canales eta Olatz Zulaika Olgetan klubeko jokalariek. 30-23 gailendu ziren finalean eta arerioak talde bereko lagunak izan ziren, Nahia Ugarriza eta Naroa Saez, alegia.
Canales eta Ugarriza orozkoarrek, Zulaika gasteiztarrak eta Saez aretarrak ibilbide luzea egin zuten finalera heldu arte. Izan ere, lehen mailan jokatu zuten, eta parte hartu zuten hamalau bikoteak bi taldetan banatu zituzten antolatzaileek.
Lehenik eta behin, ligaxka jokatu zuten eta partida bakarra galdu zuen bikote bakoitzak. Horrek eskubidea eman zien zuzenean finalerdietan egoteko, beste batzuk final laurdenetan lehiatu behar ziren bitartean.
Olgetan klubeko kirolariek euren norgehiagoketan nagusitu ziren eta Sopelako pilotalekuan erabaki zen txapelduna.
Kluba oso pozik
Gazteek osatzen duten klubak poztasuna adierazi du, lehen mailan eta promozio mailan ere kalitate izugarria erakutsi dutelako. Izan ere, promozio mailako txapelketa ez badute irabazi ere, bigarren, hirugarren eta laugarren postuak orozkoarrenak izan dira.
Dena den, denboraldiak aurrera egiten jarraitzen du eta Gravni zein Emakumezkoen Larruzko Pilotako VI. Bizkaia Paleta Txapelketan buru-belarri sartuta daude jadanik jokalariak.