Orozkoko Udalak aholkularitza sexologikorako zerbitzua jarri du martxan, eskola eremuaz gain, helduaroan eta zahartzaroan ere sexuari lotutako gaiak jorratzeko. Besteak beste, orozkoarren identitateek, harremanek edo desirek sorrarazitako behar zein eskaerak kontuan hartu nahi dituela adierazi du Udalak, "ongizate subjektiboarekin zuzenean lotuta" daudelako.
Horretarako, espazio bat jarriko dute eskura Zubieta hiribideko 16. zenbakian, eta Uxue Astorga sexologo profesionala izango da kontsultaren arduraduna. Udalak azaldu duenez, zerbitzu "eskuragarria, doakoa, hurbila eta segurua" izango da; eta, beraz, konfidentzialtasuna ziurtatuta dago.
Hainbat dira kontsultetan jorratu daitezkeen gaiak, hala nola bikote harremanari eragiten diotenak, identitate eta orientazio sexualari lotutakoak, desira eta gustuei buruzkoak edota sexuak eragin ditzakeen plazer zein minen ingurukoak. Horren guztiaren inguruan hitz egiteak eta aholkularitza jasotzeak, hainbat alderdi positibo dituela nabarmendu du Orozkoko Udalak. Horien artean daude, esaterako, egoera zehatzei buruz dugun bizipena aldatzeko ikuspuntu desberdinak jasotzea, norbere buruaren ezagutza hobea lortzea eta autonomia handiagotzea.
Zerbitzua erabili nahi izanez gero, aurretiko hitzordua hartu behar da, zuzenean aholkularitzaz arduratuko den profesionalarekin, horretarako 722198893 zenbakira deitu daiteke edo uxue.sexologia@gmail.com helbide elektronikora mezu bat bidali.