1960. hamarkadan girotua, familia txiro baten aurrera ateratzeko ahalegina du hizpide Igor Garcia zuzendariaren film labur berriak. Iragan asteburuan Orozkoko Bengoetxea auzoko baserri batean grabatu zituzten hainbat eszena.
Zuzendaria izateaz gain, gidoilaria ere bada Igor Garcia. Hain zuzen ere, bere familian gordetako istorio bat du ardatz ikus-entzunezkoak. "Erreferentzia oso argia egin nahi izan diot nire familiari. Familia umil batetik nator ni, eta sustraiei buruz hain ondo hitz egiten zuen istorio hori berreskuratu nahi nuen, bigarren aukeren ideia lantzeko", azaldu dio zuzendariak Aiaraldea Komunikabideari. Pertsonaien eta istorioaren "zaurgarritasunean" egin du azpimarra Igor Garciak, eta "pozik" azaldu da orain arteko emaitzarekin.
Ane Pikaza eta Aitor Borobia aritu dira aktore lanetan. Ekoizpen buru, aldiz, Txemari Ortiz de Luna tertangarra egon da, eta baita Amurrioko beste hainbat kide ere. Nola edo hala, tokiko zigilua ere badarama Zezena eta umea film laburrak.
Orozkon eta Mallabian
Bilaketa sakon baten ostean, Orozkon eta Mallabian topatu zituzten filma grabatzeko agertoki egokiak. Txemari Ortiz de Luna ekoizlea egon da bilaketa lan horietan. Azkenean, bi udalerrietako bi baserriak nahastuz lortu dute fikzioaren erdigunea izango den etxea sortzea.
Orozkoko Bengoetxea auzoko baserrian sukaldeko eta logelako eszenak ekoiztu dituzte, baita idi batekin grabatutako eszena luze eta korapilatsu bat ere. Mallabiako lokalizazioan, aldiz, kanpoaldeko planoak grabatu dituzte nagusiki.
Hizkuntzaren garrantzia
Euskaraz filmatu dute pelikula, bizkaieraz hain zuzen. Igor Garcia zuzendariak garrantzia berezia eman nahi izan dio hizkuntzari, eta teknikari baten laguntza izan dute bizkaiera ahalik eta zuzenen baliatzeko. Ane Pikaza aktoreak "erronkatzat" jo du film laburrean hizkuntzak izan duen trataera: "Guretzako erronka handia izan da. Bizkaitarrak izan arren guk batuaz egiten dugu berba nagusiki. Konturatu gara oso galduta daukagula bizkaiera eta zenbait gauza berreskuratzeko beharra ikusi dugu".
Lanari buruz galdetuta, oso positiboki baloratu du Pikazak orain arteko prozesua. "Nik aspaldi jaso nuen gidoia, eta hasieratik asko gustatu zitzaidan proposamena", azaldu du aktoreak, "proiektuak aurrera egin duen modu berean, Igorrek aurkikuntza berriak egin ditu. Polita izan da prozesua ikustea. Oso eskuzabala izan da gure proposamenak entzuterako orduan".
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!