Larunbat honetan egingo dute Orozko Rock jaialdiaren azken edizioa, baina giroa berotzen hasi dira dagoeneko herrian. Astelehenetik dago ikusgai museoan Rockerakusketa, jaialdiaren 5 urteko ibilbideari errepasoa egiten diona.
Hain zuzen, museoan bertan abiatuko dute larunbateko egitaraua, Gertrude kultur elkarteak antolatutako mahainguruarekin. Euskal Herriko jaialdien ereduei buruz mintzatuko dira 12:30etatik aurrera.
Amaia Nerekan Umeran sortzailea eta EHUko doktorea izango da moderatzailea, eta beste bost kideren hitzartzeak dinamizatuko ditu: Pablo Salgado, Estefania Serrano, Txema Agiriano, Josu Ximun eta Joane Bilbao.
Solasaldia amaituta, Zubiaur plazara mugituko da giroa. Swamp Stringband taldeak girotuko du herrigunea 13:30etatik aurrera, 15:00etan herri bazkaria egingo dute eta NØT taldea arduratuko da arratsaldeari lehen notak jartzeaz, toki berean.
18:30ean irekiko dituzte kontzertuen guneko ateak, eta bata bestearen atzetik igoko dira oholtzara kartelean iragarritako taldeak:
19:00 // Barrrk
20:00 // Nevadah
21:30 // Arene 6
23:00 // Bizardunak
00:50 // Moonshine Wagon
02:00 // AK & La Woman DJ Set
Sarrerak salgai daude oraindik Itxina tabernan eta Orozkorock.eus atarian.
Argazkiak: Miguel Brizuela