Maiatzaren 31a egun seinalatua izango da Orozkon. Azoka eguna egingo dute larunbatean, eta Azpigorri eta Euskal Herriko Mendiko Zaldi txapelketak izango dira eguneko ekintza nagusiak.
Eguneko protagonista izango diren abereak 8:30ean iritsiko dira azoka gunera. Bertaratuko diren herritarrek, ordea, bestelako jarduerez gozatzeko aukera izango dute ere, hala nola, 10:00etan irekiko den nekazaritzako elikagaien eta artisautza produktuen merkatuaz. Postuetan egindako erosketa guztien egileek tokiko produktu-loteen zozketan parte hartzeko aukera izango dute. Gainera, merkatuan egindako 30 eurotik gorako gastu bakoitzak azokako produktuez osatutako opari bana jasoko du, stock-a agortu arte.
Pilota partida profesionalak
Eguna borobiltzeko, pilota partida profesionalak jokatuko dituzte udal-pilotalekuan. 2025eko Bizkaia Torneoko final-laurdenak izango dira, eta puntako kirolariak elkartuko dira bertan, Iker Larrazabal aiararra tartean. Larrazabal Mariezkurrenarekin batera arituko da, Urrutikoetxea-Iztueta bikotearen aurka. Buruz-buruko kategorian Eskiroz eta Senar arituko dira aurrez aurre. Lau t'erdiko kategorian, aldiz, Peña II. eta Jaka izango dira norgehiagokan.