Urtzi Vera argazkilariak AEFONA elkarteko nazioarteko argazki lehiaketa irabazi du. Berez, lehen saria eta aipamen berezia berarentzat izan dira Landareen erresuma kategorian. 2.000 irudi baino gehiago jasotzen ditu deialdiak.
Colossus irudiarekin eskuratu du sari nagusia. Horretan ehunka urteko pago bat islatu du. 300 euro jaso ditu dirutan eta beste 500 aplikazio informatikoetan.
Aipamen berezia, aldiz, Alive argazkiak eman dio, zeinean basoak duen bizitza eztanda erretratatu duen, negua atzean utzita.
Elkarteko kide aspaldi
Vera duela 20 inguru da AEFONAko kidea. "Duela 20 urte edo hasi nintzen natura argazkigintzan eta berehala bilakatu nintzen kide", azaldu du.
Ez da lehen aldia parte hartzen duela lehiaketan: "Partaideontzat doakoa da eta iaz, adibidez, bi argazki bidali nituen eta biak finalista izan ziren".
Kilometro zeroko argazkiak
Urtzi Verari harrotasuna sortu dio hurbileko argazkiak egin izanak: "Kilometro zeroko irudiak dira. Gorbeian egin ohi ditut nire lanen %90 eta hauek Itzinan hartu nituen".
Argazkilaria, gainera, ikastaroak eskaintzen jarraituko du Orozkon. Ikasturte honetan urtarriletik aurrera egingo du eta beste urte batzuetan baino ordu gehiagoko proposamena egingo du.