Urtero antolatzen dute Supelaur elkarteko kideek filma laburren lehiaketa. Aurten, aldiz, edizio berezi bat egitea erabaki dute, Palestinako egoera jendarteratzen laguntzeko helburuarekin.
Horretarako, filma palestinarren proiekzioa antolatu dute gaurko. Arratsaldeko seietan izango da zita Donibane aretoan. Sei ikus-entzunezko labur eskainiko dituzte guztira, seiak Palestinako zinemagileek ekoiztutakoak.
Antolatzaileek azaldu dutenez, urriaren 2an mundu mailako ekimen bat egon zen pelikula palestinarrak proiektatzeko. Ekimenera batzea bururatu zitzaien, baina ez zuten behar besteko denborarik izan Udalarekin dena bideratzeko. Gaurko, aldiz, gauza ugari lotzea lortu dute. Ez dira pelikulak proiektatzera mugatuko. Azaldu dutenez, musikari palestinar batzuk ere bertaratuko dira proiekziora, gero Gernikan kontzertua eskainiko dutela baliatuta. Horrez gain, filmetako batzuen zuzendariek bideoak grabatu dituzte euren lanak orozkoarrei aurkezteko. “Horietako batzuk Gazan daude uneotan”, zehaztu dute Supelaurreko kideek.
