Orozkoko frontoiko itxitura berriak badu proiektu irabazlea. Herritarrek bi egitasmoren artean aukeratzeko tartea izan zuten abenduan: egurrezko itxitura edo metalezkoa. Abenduaren 19an itxi zen bozketa fasea eta Udalak hautaketa prozesuaren emaitzak argitaratu berri ditu. Guztira 464 orozkoarrek eman dute iritzia, eta egurrezko itxituraren alde egin du gehiengo oso handi batek. Orozkoko Udalak prozesuaren "parte hartze maila altua" jarri nahi izan du balioan, eta herritarrek "inguruko gai publikoekiko duten interesaren erakusle" dela nabarmendu du.
Gauzak horrela, eta botoen % 93,5 eskuratuta, egurrezko itxitura izango du aurrerantzean Orozkoko pilotalekuak. Proposamen irabazleak jasotako babes zabala "iraunkortasun-irizpideak, tokiko paisaiarekiko koherentzia eta eraikuntza-tradizioa" biltzen dituzten irtenbideen aldeko herritarren apustu argia dela adierazi du tokiko gobernuak. Hobekuntza berri honekin, espazioaren aprobetxamendua are gehiago ustiatu nahi du Udalak, bai kirol praktikarako zein aisialdirako.