Orozkoko Udalak eta Induma Informazio Bulegoak beste urte batez antolatu dute Orozko Klik lehiaketa. Parte-hartzaileek sei irudi aurkeztu beharko dituzte, eta hiru serie onenetatik 12 argazki hautatuko ditu epaimahai profesionalak, 2027ko egutegia osatzeko. Irailaren 15era arte dago proposamenak aurkezteko epea.
Antolatzaileek azaldu dutenez, honako alderdi hauek modu positiboan baloratuko dira: argazkien artean auzoetako zein herriko jai nagusietako argazkiak egotea, herriko espazio ezberdinak eta ezaguterrazak direnak irudikatzea eta argazkiak urteko une eta urtaro ezberdinetan ateratakoak izatea, besteak beste. Paisaiak, auzoak, animaliak zein jendea agertu ahalko dira irudietan, eta sormena ere baloratuko dute.
Hamalau urtetik gorako edozein pertsonak aurkeztu ahalko du bere bilduma, posta elektronikoz, infoinduma.orozko@bizkaia.org helbidean, datu pertsonalak ere adierazita. Hemen kontsultatu daitezke lehiaketaren xehetasun eta oinarri guztiak.
Hiru proposamen garaileek 300 euroko sari bana eskuratuko dute, argazkiak egutegian agertzeaz gainera.