Zaloako bizilagunek gogotsu heldu diote 2026ko auzoko jaien antolakuntzari. Izan ere, egungo Jai Batzordeak antolatutako festen X. urteurrena da aurtengoa. Garai bateko Zaloako festek zuten sona berreskuratzeko asmoz gazte talde batek Zaloako Jai Batzordea sortu zuen 2016an; ordutik “herritik eta herriarentzako jaiak” antolatu dituzte auzolanean. “Gure aiton-amonen garaian jai handiak ziren Zaloakoak, baina galduz joan ziren. Txikiak ginenean egun bakarrekoak ziren festak, eta igandean ospatzen ziren. Auzoko gazteon nahia izan da festak berreskuratzea. Urtez urte indarra hartu eta hobetuz joan gara”, azaldu dio Jai Batzordeko Garazi Santacruzek Aiaraldea Komunikabideari.
Musika eskaintza zabala
Ekainaren 26tik 28ra luzatuko dira Zaloako Jaiak, ostiraletik igandera. Urteroko eskema jarraituko dute aurten ere, baina apustua koska bat gehiago igo eta ostiral gaua are gehiago indartzeko asmoa azaldu du Santacruzek. Horretarako ardura Moonshine Wagon folk taldeak izango du, aurtengo jaietako kartelburua. Hiru diska kaleratu eta mundu osotik zuzenekoak eskaintzen aritu ostean Zaloako oholtzara ekarriko dituzte bluegrass doinuak, auzotarrek kontzertu “apoteosikoa” espero dute. Moonshine Wagonekin batera Addar rock taldea arituko da. 2018an sortu zirenetik ibilbide oparoa egin dute bermeotarrek: lau disko kaleratu dituzte eta 2020an Rockein lehiaketako euskarazko musika talderik onenaren saria lortu zuten.
Herritarren neurrira
Jaietako larunbata ekintzaz beterik dator aurten ere: puzgarriak, herri kirolak, paella txapelketa… Paella txapelketak Orozkoko bizilagun asko elkartzen dituela azaldu du Santacruzek; “udari hasiera emateko modu aproposa da Zaloako paella txapelketara bertaratzea”.
Paella txapelketatik haratago ere, orozkokoarrak izango dira ekainaren 27ko protagonistak, zalantzarik gabe, eta musika eskaintzan agerikoa da hori. Herriko Ganorabakos taldeak eta DJ Arriagak jarriko diote erritmoa larunbat iluntzeari. Gautegun erromeria ere izango da Zaloako Jaietan, eta “hiru orduko emanaldi indartsua eskainiko du”.
Igande eguerdian agurtuko dituzte jaiak, bertsolari eta porra txapelketarekin.
Jai Batzordetik Zaloara gerturatzeko gonbita luzatu diete Orozko eta inguruko herrietako bizilagunei: “Erdu auzora eta gozatu gugaz!”.
EGITARAU OSOA
Ekainak 26, ostirala
20:00 // Jaien hasiera
22:00 // Kontzertua: Addar eta Moonshine Wagon
Ekainak 27, larunbata
11:30 // Meza eta pintxoak
12:15 // Paella Txapelketa
12:30 // Jasoka Herri Kirolak
14:30 // Paellen aurkezpena
17:00 // Kalaka egurrezko jolasak
19:30 // Garagardo dastatzea
21:30 // Kontzertuak: Ganorabakos, DJ Arriaga eta Gautegun erromeria
Ekainak 28, igandea
13:00 // Bertsolariak
13:00 // Porra Txapelketa
13:00 // Pintxoak, zozketa eta jaien amaiera