Menpekotasuna duten pertsonen zaintza euren gain hartzen duten lagunentzako hitzordua prestatu du egoera horretan dagoen herritar batek irailaren 26rako. Goizeko jarduera izango da Jentilbaratze landetxean. Zehazki, 10:00etan hasi eta 13:30ean amaituko dute ekimena.
45 euro balioko du ekintzak eta izen-ematea 688 89 37 89 telefono zenbakian egin daiteke.
Zaintzaileek burua zaintzea
Begoña Tome antolatzaileak azaldu du zergatik ekin dioten horrelako hitzordua deitzeari: "Mendeko pertsona bat zaintzen baduzu, badakizu zaintzea nekagarria ere izan daitekeela. Horregatik, deskonektatzeko, energia berreskuratzeko eta zure buruari kalitatezko denbora eskaintzeko topalekua prestatu dugu".
Berez, arnasketa kontzientearen onurei eta teknikei buruzko hitzaldia eskainiko du Gorka Gamizek eta gero saioa gidatuko du.
Tomek azpimarratu du laguntza emozionalerako gunea sortu nahi dutela eta gero mokadua partekatuko dutela bertaratzen direnen artean.