Trail lasterketa berria du eskualdeak. Aiaraldeko zein Euskal Herriko korrikalari askoren egutegian dago honezkero datorren urriaren 17an Orozkon egingo duten Itxinan Barrena lasterketa. Antolatzaileek azaldu dutenez, "Itxina mendiguneko paisaia basatienak zeharkatzen dituen mendi lasterketa zorrotz eta teknikoa da" hurrengo asteko larunbatekoa.
Bi ibilbide proposatu dituzte: 34 kilometroko luzera eta 2.000 metro desnibela duen lasterketa nagusia eta 14 kilometroko lasterketa laburra.
Biek ala biek Itxina mendiguneko "espiritu bakarra" ordezkatzen dutela ziurtatu dute antolatzaileek. Gorbeiako Parke Naturaleko txoko ikusgarriak zeharkatuko ditu lasterketak. Bi ibilbideek Kurtzegango Menhirrean egingo dute bat, besteak beste, korrikalariak animatu nahi duen ororentzako toki egokia bihurtuz espazio hori.
Iragan irailaren 17an itxi zen lasterketan parte-hartzeko izen ematea. Guztira ia 400 korrikalari batu dira estreinako hitzordura, eta ziurtzat jo daiteke lehenengo edizioaren arrakasta.
Egun osoko egitaraua
Kirol probatik harago, ekintza ugari antolatu dituzte urriaren 17rako Orozkon bertan, lasterketako parte-hartzaileei zein Gorbeiako Parke Naturalera gerturatuko diren ikusleei zuzenduak. Goizean puzgarriak eta jazz ekitaldia egongo dira Zubiaur Plazan eta arratsaldean Ustekabe Txarangak girotuko ditu herriko kaleak. Iluntzean, aldiz, DJ Arriaga egongo da festa giroa luzatzen.