Bizkaibuseko 3613 linearen funtzionamenduak ezinegona sortu du Orozkoko erabiltzaileen artean. Izan ere, Laudioko anbulatorio berrian geltokia jarri eta gero, atzerapenak gertatzen ari dira eta horrek arazoak sortzen dizkie autobusak hartzen dituzten ikasle zein langileei.
Berez, Orozko eta Bilbo lotzen ditu linea horrek eta atzerapenek udalerri guztiei eragiten badiete ere, bereziki larria da egoera Orozkon, udalerriko garraio publikoaren alternatiba bakarra delako, azaldu dutenez.
Beharginei ere kalteak sortzen dizkien arren, orozkoarrek azpimarratu dute goizero gazte askok Laudio, Amurrio edo Urduñako ikastetxeetara joan behar izaten dutela eta beste askok unibertsitatean ikasten dutela. Ondorioz, Aretara joan behar izaten dute trena hartzera eta hori galtzen dute zerbitzua atzeratzen bada.
Bi autobus jarraian eta gero ordubeteko itxaronaldia
Orozkoko ikasleen gurasoek zabaldutako testuan aipatu dute atzerapenek erabat aldatu dutela zerbitzuaren maiztasuna: "Orain arte ordu erdiro ateratzen ziren bi autobusak, orain 10 edo 15 minutuko aldearekin iristen dira zenbait unetan. Gero ia ordubete pasa daiteke hurrengo autobusera arte".
Anbulatorioan jarritako geltokia atzerapenen iturburua bada ere, orozkoarrek argi dute hori ez dela arazoa eta zentzu guztia duela garraio publikoa haraino heltzea. Edonola ere, Bizkaiko Foru Aldundiari eskatu diote mugikortasun arazoari ikuspegi zabalagoarekin erantzuteko.
Gainera, atzerapenak metatzen dira: "Autobus bat bere ibilbidearen amaierara berandu iristen denean, atsedenaldiak eta gidarientzat aurreikusitako txandak ere aldatzen dira. Batzuetan, hurrengo ibilbidea hasi ondoren aldatu behar izan da gidaria, are atzerapen handiagoa gehituz".
Anbulatorioarekin arazorik ez
Anbulatorioan jarritako geltokia atzerapenen iturburua bada ere, orozkoarrek argi dute hori ez dela arazoa eta zentzu guztia duela garraio publikoa haraino heltzea. Edonola ere, Bizkaiko Foru Aldundiari eskatu diote mugikortasun arazoari ikuspegi zabalagoarekin erantzuteko. Zehazki, "ibilbide berria behin betiko finkatu aurretik beste aukera batzuk aztertzea eta mugikortasunaren azterketa globala egitea" eskatu dute. Euren ustez, "azterketa horrek baloratu beharko lituzke ibilbide berriak behar dituen benetako denborak, maiztasunen banaketa, gidarien antolaketa eta, batez ere, aldaketa horrek egunero linea erabiltzen zutenentzat dituen ondorioak".