Eguraldiak ez dizkio gauzak erraz jarri Itxinan Barrena lasterketaren lehen edizioari, baina ez du axola izan. 400 kirolari inguru bertaratu dira goizeko lehen orduan Zubaiur plazara, lasterketa luze zein motzean parte hartzeko prest. Adarraren soinupean abiatu dira Itxinarantz, eta ondoren tantaka joan dira helmugara heltzen, goizean zehar.
Oraindik ez dago behin betiko sailkapena osatuta, baina orozkoarren parte hartzea nabarmena izaten ari da proban, herriko 60 bizilagun inguru animatu baitira parte hartzera, eta beste hainbat dira antolakuntza lanetan murgilduta daudenak.
Izan ere, gaurko eguna ez da eguerdiko ordubietako sari banaketarekin amaituko, herri bazkaria ere prestatu baitute, eta giroa gauera arte luzatzeko aukera egongo da, Ustekabe txarangarekin eta DJ Arriagarekin.
Dena den, eguna amaitzeko tartea geratzen den arren, lasterketaren antolatzaileek balorazio positiboa egin dute dagoeneko, eta aurreratu dute trail egutegian iltzatuta geratuko den proba izango dela Orozkokoa, asmoa baitute datorren urtean errepikatzeko.