Urduñako Jai-Alai Pelotazale Elkarteak eta Txarlazo Mendi Taldeak iraileko egitaraua aurkeztu dute. Batetik, Jai-Alai Pelotazale Elkarteak Koroatze jaien baitan eskupilota partidak antolatu ditu. 18:00etatik aurrera bi norgehiagoka egongo dira. Lehendabizikoa Iñaki Oiartzabal eta Ibai Florianok jokatuko dute, Basauritarren kontra. Bigarrena, aldiz, Joseba Albizurik eta Aitor Ayestak Orozkoko Beaskoetxea eta Iriondoren aurka jolastuko dutena izango da. Bestalde, Eskupilota eskolan izena emateko tartea ere ireki dute. Astelehen eta asteazkenetan egongo da horretarako aukera, 17:00etatik aurrera frontoian bertan. Klaseak doakoak izango dira, eta euskaraz. Ardurardunen esanetan, 6 urtetik gorakoei zuzenduta dago jarduera.
Txarlazoren irteerak
Bestalde, Txarlazo mendi taldeak Urduñako fruta arbolak ezagutzera emateko txangoarekin abiatuko du ikastureta. Irailaren 4ean izango da goizpasa. Hilaren 17an eta 18an, baina, Pirineotara joango dira Pico Bacia eta Peyreget tontorrak igotzera. Bazkideentzako prezioa 50 eurokoa izango da, autobus bidaia eta aterpetxea barne. Autobusa larunbatean 05:00etan abiatuko da. Izena ematea Marrazki tabernan egin beharko da. Mendizale elkartetik adierazi dutenez, txangoa "erraza eta polita" da.