Irailaren 2tik 4ra murgilduko da Urduña jaietan berriro, izan ere, Koroatzekoiak ospatuko dituzte asteburuan. Egitarauari dagokionez, Urdufolken laugarren edizioa, txapelketak eta euskal kanten topaketak izango dira nagusi.
Urdufolken laugarren edizioa
Ostirala eta larunbata hartuko ditu Urdufolken laugarren edizioak. Ostiralean 19:30ean abiatuko du Asturiaseko El Trasnos gaita taldeak jaialdia kalejira batekin, eta ondoren, 21:00etan kontzertua eskainiko dute Foru plazan. Segidan, Iparfolk (Euskal Herria) eta Bran the blessed (Salamanka) taldeak entzuteko aukera izango da, nazioarteko folk lehiaketako finalistena, hain zuzen.
[video:https://www.youtube.com/watch?v=yRidVjGlgrA width:650 height:350]
Larunbateko kalejira trikitilariek gidatuko dute. Kontzertuak 21:00etan hasiko dira. Oraingoan, ordea, Valentziako Besarabia eta Andaluziako Antonio Lizanaren txanda izango da. Urdufolken inguruko informazio guztia www.urdufolk.com webgunean dago.
[video:https://www.youtube.com/watch?v=l9AEVZG1Q2I width:650 height:350]
Marmitako eta bola txapelketa
Larunbatean XVII. marmitako txapelketa ere egongo da Foru plazan. 9:00etan hasiko da lehiaketa, eta partaideek bertan bazkaltzeko mahaiak eskatzeko aukera izango dute.
Txolope bola taldeak, bestalde, Koroatze jaietako bolo txapelketa antolatuko du larunbatean. Partidak 18:00etan hasiko dira udal bolatokian, eta igandean 11:00etatik aurrera jarraituko du norgehiagokak.
Pelotazale elkarteak ere eskupilota partidak egingo ditu frontoian 18:00etatik aurrera.
Kale antzerkia eta haur parkea
Larunbataz gozatzeko aisialdi ekintzak ere ez dira faltako Urduñan. Esaterako, haurrek jolas parkea izango dute goiz eta arratsaldean. Besteak beste, gaztelu puzgarriak eta apar festa egongo dira. Iluntzean, aldiz, Goloka taldeak “Piratak” emanaldi ibiltariarekin alaituko ditu kaleak, 19:00etan Gernika plazatik abiatuta.
Erraldoi, buruhandi eta Euskal kanten topaketa
Igandean, berriz, denetariko ekintzak egongo dira. Tradizioari jarraiki, 11:00etan Antzinako santutegian meza egingo dute, eta ondoren Foru plazan Erraldoi eta buruhandien alardea gauzatuko du Bihotza Konpartsak. Aurten, gainera, 15. urtemuga ospatzen ari dira; eta hori dela eta, buruhandi zein erraldoiekin argazkiak ateratzeko aukera emango diete bertaratzen direnei.
12:30ean, berriz, Euskal kanten topaketari ekingo zaio. Urduñako Santa Zezilia musika banda eta Urduñako Oilarrak taldearekin batera, Laudioko Los Arlotes abesbatza eta Sopuerta eta Sestaoko Atxaspe-Babcock taldea arituko dira abesten. Ekitaldia 15:00etan bukatuko da Posada aurrean.
Jaiei amaiera emateko herri kirolen erakustaldia egongo da Foru plazan. Hala, 19:30etatik aurrera aizkolariak, harri jasotzaileak eta iparraldeko jokoak ezagutzeko aukera egongo da.