Urduñako Udalak herritarrek parte hartzeko bi prozesu abiatu ditu. Lehenengoa Antzina auzoan garatu dute, bertako umeekin jolas gune berria aukeratzeko. Bigarrenak, berriz, Landata auzoa konpontzea du helburu.
Antzinako umeak protagonista
Antzinako auzoko jolas gunea berritzeko prozesuan bertako haurrak izan dira protagonista. Izan ere, beraiek izango dira erabiltzaile nagusiak. Ekainean ekin zioten umeekin asanbladak antolatzeari. Bertan, umeek nolako parkea nahiko luketen adierazi zuten. Udan egingo dituzte atonketa lanak, eta eskolako oporrak bukatu aurretik izango dute haurrek txirrista gune berria.
Landata auzoko proiektua
Halaber, Landata auzorako proiektuaren diseinua bizilagunekin partekatu eta osatzeko auzo asanblada egin zuen duela egun batzuk udalak. Auzokide ugari bildu ziren, eta udaleko kideekin batera aurrera begira elkarlanean aritzeko lan-taldea osatu zuten. Hortaz, herritarrekin batera erabakiko da Landata auzoko konponketen prozesua eta diseinua. Duela hilabete batzuk hasi zuten Landata auzoko obren lehen fasea, eta ondorengo aldaketak bizilagunen eta hiriaren beharretara egokitzeko sortu dute lan-taldea. Era berean, atarietako izen frankistak kentzea eta Landata izena eta edifizioei dagokien zenbakia jartzea erabaki zuten asanbladan.