Urduñako Udalak ez-ohiko udal osoko bilkura egingo du astelehenean, 10:30ean, frankistei ohoreak eta dominak kentzeko.
Tokiko erakundeak hainbat akordio lortu zituen iraganean Francisco Franco eta bere erregimenari lotutako hainbat lagun omentzeko, eta aitorpen horiek bertan behera uzteko mozioa eztabaidatuko dute.
Salas Larrazabal, “Otxandioko harakina”
Ángel Salas Larrazábal 1906ko urriaren 1ean Urduñan jaio zen eta 1921ean armadan kadete gisa hasi zen eta 1927an aireko armadara pasatu zen. Uztailaren 18an gerra zibilaren hasieran, hegazkin bidez, altxatutako militarren arteko lotura lanak betetzearen ardura jaso zuen, Iruñeako Mola, Tetuaneko Franco eta Sevillako Queiporen artean.
Euskal lurraldeetan egondako borroketan parte hartu zuen eta guztien artean aipagarriena 1936ko uztailaren 22an, José Muñoz Jimenezekin batera, Otxandio bonbardaketa izan zen, 61 hildako zibil eragin zituena. Ekintza honen ondorioz Otxandioko harakina ezizena jaso zuen.
Komunismoaren aurka ere
Gerra Zibilaren amaieran ardura militarrak bete zituen (21. kaza erregimentuko komandante eta Estatu Nagusian 4.sekzioko arduradun), baina 1941eko uztailean Alemaniara joan zen Errusiako borrokan parte hartzera boluntario gisa, horretarako sortua zen Eskuadrila Urdinaren baitan komandante ardurak betez.
Gerra Zibilean eta Errusiako gerran parte hartzearen ondorioz Salasek bereizgarri militar batzuk jaso zituen: Domina Militarra, Aireko Domina, Alemaniako Urrezko Gurutzea, 1º eta 2. mailako Burdinazko Gurutzea.
Frankismoaren diplomatikoa
40 eta 50. hamarkadetan Salasek, Europan (Erroma, Berlin, Lisboa, Paris), ardura diplomatikoak bete zituen, aire armadaren izenean. Baina baita ere beste ardura militar batzuk ere eduki zituen: Defensan Aire Armadaren arduraduna, Canarietako Aire Eremuaren arduradun; Goi Mailako Ikasketa Militarren eskolaren arduradun; Hegazkintza Taktikoaren Agintaritzan buru; Gibraltarreko itsasarteko Aire eremuko Mandoan buru.
Erregearekin lanean
1972. urtean bere ardura militarrak albo batera utzi zituen eta ardura politikoei ekin zien: Erreinuko Kontseiluan armadaren ordezkari 1974-1976 artean; 1975ean Erregentzi Kontseiluko kide; 1976an Jaun Carlos I-ari botereak ematearen arduradun; 1977-79 artean Senataria, Gorte Konstituziogileek aukeratua.
1991. urtean Juan Carlos I.-ak Aire Armadaren Kapitain Jeneral maila eman zion, “lortutako meritu pertsonalak zirela eta”.
1994ko apirilaren 26an Madrilen hil zen.