Urduñako Jai Batzordeak ekintza sorta zabala prestatu du jaien bigarren txanparako. Maiatzaren 6an hasi ziren Otxomaioak, eta 15ean bukatuko dira, igandean, hain zuzen.
O´Funkillo
Musikari dagokionez, eskaintza zabala izango da; gaur Akerbeltz eta Sakatu elektrotxaranga arituko dira eta bihar, aldiz, Kompadres Muertos eta O´Funkillo taldeak.
Dena den, bigarren txandan kirol probak izango dira nagusi. Batetik bolo txapelketa egongo da, Txolope elkarteak antolatua. Ostiralean eta larunbatean izango dira bolo tiradak.
Bestalde, Urduñako txirrindulari elkarteak eta beste hainbat kolektibo zein norbanakok, bigarren haur triatloia egingo dute larunbat goizean Foru plazan. Hala, haur txikienetatik hasita gaztetxoetara, bizikletan, korrika eta saskibaloian aritu beharko dira partaideak. Bestalde, Gualdetxu MBT Trail taldeak "Urduña Hiria gau martxa" ospatuko du larunbat gauean. Aurten, gainera, trail modalitatea gehitu diote ekimenari. Hortaz, nola bizikleta gainean hala korrika parte hartu ahalko da gaueko martxan.
Bertan behera geratutako ekintzak
Otxomaio egunean egin behar zen zezenketa larunbatean antolatzeko asmoa iragarri zuen Zezenzale Klubak. Izan ere, eguraldi txarra dela-eta, bertan behera utzi zuten ikuskizuna. Alabaina, sarreren dirua itzuli egin zitzaien ikusleei. Emakumeen zaldi proba desafioa eta Herri Kirolen erakustaldia ere asteburuan egingo dela jakinarazi du Jai Batzordeak .