Urduñako Bihotza Konpartsak 15 urte bete ditu. Hori dela-eta, ekitaldi ugari egingo du urtean zehar. Apirilaren 30ean, esaterako, erraldoi bikote berria aurkeztuko dute 12:30ean Foru plazan.
Konpartsaren historia
Urteetan zehar Txomin Robina buruhandien konponketan zein Bihotzaren erreketan laguntzen ibili ondoren, gazte talde batek Bihotza Konpartsa sortzea erabaki zuen.
Helburua zen ondo pasatzea buruhandi eta erraldoien barruan. Hala, lehendabiziko lana Kultur izan zen etxean geldi zeuden erraldoiak jaso eta konpontzea, 1955ean sortuak. "Egitura berritu genion, margotu eta jantzi berriak egin... Horri esker gaur, 61 urte eta gero errege-erregin erraldoiak gure hiriko kaleak zeharkatzen dituzte", adierazi dute prentsa oharrean.
2003an "Txomin serenoa" buruhandia sortu zuten, haien "zaintzailearen" omenez. 2004an, aldiz, "Erraldoi dantzariak" aurkeztu zituzten, eta ondoren "Bihotza" eta "Batibomba".
2007an, Aduanako bainuetxearen irekiarekin batera "Sabina bainularia" estreinatu zuten. Zortzi urte beranduago, 2012an, osatu zuten hurrengo figura, "Benita Zazpi Zapi" izenekoa, eta 2013an "Buruhandi historikoak" berpiztu zituzten, 50eko hamarkadan existitu ziren irudien erreplika.
Azken urteetan jarduera areagotu du Bihotza Konpartsak. Izan ere, orain, Bihotzaren erreketa, zezen suzkoa, errege magoen kabalgata, zinema, txosnak, mus txapelketa, erakusketak... antolatzen ditu.