Aurtengo Aste Santua berezia eta anitza izango da urduñarrentzat. Izan ere, makina bat ekitaldi egongo dira martxoko oporraldian. Batetik, rol topaketak egongo dira, kanpotik etorritako ehundaka lagunek parte hartuko dutelarik. Martxoaren 24tik 27ra mahai jokoak, rol jolasak... ikusi eta ezagutzeko aukera egongo da frontoian. Gainera, herrira ere hedatuko dira hainbat dinamika.
Prozesioak
Bestetik, Kristoren Eskolak Aste Santuko prozesioak egingo ditu. Martxoaren 20an hasiko dira, eta 28an bukatu. Tarte horretan, ordea, 14 prozesio zein ekitaldi izango dira. Ostiral Santuan, hilaren 25ean, pilatuko dira horietako gehienak: 5:00etan, 8:45etan, 11:00etan, 16:30ean, 17:30ean 19:00etan egingo baitira segizioak. Larunbatean, berriz, eliz musika emanaldia eskainiko du Urduñako abesbatzak Andra Mari parrokian 19:00etan.
Irteerak eta tailerrak
Euskara eta Kultura arloek, bestalde, nola ibilaldiak hala tailerrak eskainiko dituzte. Martxoaren 21etik 23ra, esaterako, tailerrak egongo dira Alondegian umeentzako. Horietan parte hartzeko epea martxoaren 11n bukatuko da. Txangoak bi izango dira, paintball (martxoak 22) eta multiabentura ibilaldia (martxoak 30). Irteeretarako izen ematea udal bulegoetan (Kale Zaharra 2) egin beharko da martxoak 18 aurretik.
Gaztegunea
Gazteguneak ere programazio berezia izango du. Hilaren 20an, adibidez, bizkotxo tailerra egingo dute. Ping-pong txapelketa ere antolatu dute, martxoaren 25ean izango dena. Horrez gain, Altxorraren bila jolasarekin Urduñan zehar ibiliko dira martxoaren 28an.
Bestelako ekintzak
Gainera, Aiaraldeko gainontzeko udalekin eta Bertsozale Elkartearekin elkarlanean, aurten ere bertso barnetegia egingo dute Pazkoa Astean Espejon. Egonaldia 9-12 urtekoei zuzendua dago. Liburutegiak, bere aldetik, ipuin kontaketak eskainiko ditu martxoaren 23an eta 31n.