ADRATAN elkarte etnografikoak migrazioa izango du hizpide Urduñatar berriak izendatutako tertulietan. Azaroaren 5etik 8ra luzatuko dira jardunaldiak Alondegian eta hainbat herritarren ekarpenak jasoko dira bertan migrazioa hobeto ulertzeko asmoz.
Azaroaren 5ean, arratsaldeko 19:30ean, emango zaie hasiera solasaldiei. Bertan Urduñako bi auzokidek hartuko dute hitza, Jesús María Garaio eta Nuria Telleria, soziologoak biak.
Jesús María Garaiok Urduñako migrazioak azken mendean izan duen bilakaera aztertuko du. Nuria Telleriak, aldiz, migrazioak gizartean duen eragina izango du mintzagai bere hitzaldian: “Etorkin behar-beharrezkoak: ondorioak eta erronkak lurralde hartzaileetan”.
Mahai inguruak
Azaroaren 6an tertulia eta mahai inguru gauzatuko dute, arratsaldeko 19.30etatik 21:00ak bitarte. Mahai inguruan esperientzia eta bizipen ezberdinak entzun ahalko dira azken mendeko espainiar estatuan jaiotako urduñarren ahotik.
Azaroaren 7an, aurreko eguneko formatu bera jarraituz, XXI. mendeko migrazioa aztertuko da espainiar estatutik kanpo jaiotako urduñarren bizi testigantzak oinarritzat harturik.
Azkenik, azaroaren 8an, jardunaldiei amaiera emango zaie. Horretarako eguerdiko 12:00etan omenaldia egingo diote Jose Ignacio Ruiz Olabuénaga soziologo urduñarrari, migrazioaren ikerkuntzari eskainitako bizitza oso bat goraipatuz.
Horren ostean jatorri ezberdineko Urduñako auzokideen topaketarekin burutuko dute ekimena, bertan jardunaldien esperientzia baloratu eta proiektuari jarraipena emateko beharra aztertuko da.