Urduñako jairik zaharrenetarikoak dira Kalebarrikoak. XV. mendearen ingurukoak dira lehenbiziko erreferentziak, kaleko jaien antolakuntzan dabilen Carlos Galeanen esanetan. “‘Buen Suceso’ ermitan dagoen plaka batean jartzen du noiztik ospatzen den festa”.
Berriagoa da baina, jaien protagonista bilakatu den pertsonaia: Morrillon. “Bere jatorria ez dago argi”, azaldu du Galeanek, “Zeledonen imitazio moduko bat da, baina panpina bat bota ordez pertsona bat botatzea erabaki zen, bizkaitarrak arabarrak baino gehiago ginela adierazteko edo”.
Joaquin Ibañez izan zen “jatorrizko Morrillona”, Aduanako balkoitik ‘tirolina’ moduko batekin jaisten lehena.
Morriloiaren inguruan 2010an eginiko bideo-erreportajea:
[video:https://vimeo.com/135556359]
Laugarren Morrillona
Urte batzuk egon ziren gero zeintzuetan ez ziren Kalebarriko Jaiak ospatu. Festak antolatzeari berriz ekin zitzaion urtean Aitor Arbaizak hartu zuen Morrillonarena egiteko ardura. Handik aurrera, baina, Avelino Fernandezek hartu zuen lekukoa, eta urteak eman zituen lan horretan.
Fernandez, baina, iaz zendu zen. Hori dela eta, Morrillon berri bat egongo da aurtengo jaietan, laugarrena. “Oraindik ez dugu zehaztu nor izango den”, aitortu du Carlos Galeanek, baina ziurtatu du abuztuaren 15ean norbait jaitsiko dela Aduanako balkoitik, behean dauden umeei gozokiak botatzen dizkien bitartean, beti bezala.