Ekitaldi politikoa egin zuen atzo EH Bilduk Urduñako Foru Plazan Hasier Arraiz legebiltzarkidearen, Meritxell Elgezabal eta Mikel Kormenzana foru hautagaien eta Idoia Aginako alkategaiaren eskutik.
Meritxell Elgezabalek -EH Bilduko foru hautagaia Durango-Arratia barrutin- adierazi zuen: “EAJko aurreko agintarien erruagatik Urduñak egoera oso latza bizi izan du”. Horren aurrean “EH Bildu osatzen duten pertsonei esker egoera irauli da”, gaineratu zuen.
Aduana
Ildo beretik, Idoia Aginako koalizioaren alkategaiak azaldu zuen Bildu udalera heldu baino lehen “diru-xahuketa itzela” eman zela. Eta aurrera begira ziurtatu zuen Aduanaren inaugurazio berria egingo dela baina “ez herritarrak hesi baten bidez banatuz”.
Hasier Arraiz
Gasteizko parlamentuan legebiltzarkide eta Sortuko presidente den Hasier Arraizek “duela lau urte bizi izandako ilusioa” gogoratu nahi izan zuen atzo ehun pertsona ingururen aurrean.
Bere ustez “300.000 euskaldunek botoa eman zuten herri honetan garai politiko berria irekitzeko”.
Zentzu horretan “hurrengo geltokia erabakitzeko eskubidea” dela aldarrikatu zuen, “dena erabaki nahi dugulako” gaineratuz.