Bihar ekingo diote Urduñan jaietako bigarren asteburuari. San Isidro egunean adineko pertsonak izango dira protagonista. Goizean zehar Antiguako Andra Mari santutegiko meza izango da nagusi, Larruazabaleko bizilagunek San Isidro omentzeko antolatu baitute.
14:30ean erretiratuen bazkaria egingo dute Jubilatuen Etxean, 6 euroren truke. Umeek ere izango dute zertaz gozatua, barraken prezioa %50 murriztuko baitute. 17:00etatik aurrera, berriz, "Nueva presión" taldearekin erromeria egongo da Foru plazan. Herri ikastetxeko txosnan, berriz, arte tailerra, jolasak eta txokolatada prestatuko dituzte.
Bedarbide Saskibaloi klubak, bestalde, partidak antolatu ditu frontoian 17:00etatik aurrera. Umorerik ere ez da faltako, play back eta koreografien bosgarren txapelketa egingo baitute 20:30ean Foru plazan. Ondoren, kuadrilen poteoa eta afariaren txanda izango da.
Eguna ondo amaitzeko "Akerbeltz" taldearen kontzertua egongo da Foru plazan.
Larunbata, ekitaldiz lepo
XVI. Arrantza lehiaketarekin hasiko da larunbata. Txapelketa Gamako lakuan egingo dute. 11:30ean, aldiz, umeentzako lehen triatloia abiatuko da Foru plazatik. Eguerdian, ordea, kantu poteoa egongo da, eta 15:00etan herri bazkaria Gernika plazan.
Urduña Hiria Aurresku txapelketa 19:00etan hasiko da Gernika plazan. Gauean kontzertuak eta Gualdetxuren gaueko bizikleta martxa izango dira nagui. 22:30etatik aurrera "Gwa Ya reggae band", "Habeas Corpus" eta "El bastón de la Vieja" taldeak oholtzaratuko dira Foru plazan, eta 04:00etan "Dj The Midel fingerren" emanaldia egongo da. Urtero bezala, Urduñako Gazte Asanbladak jai giroa sortzeko kalejira egingo du 0:00etan.
Igandean amaituko dira Otxomaio jaiak. Goizean, baina, XXXIV.Bakailo lehiaketa egingo dute Foru plazan, baita txikien mendi martxa ere. Arratsaldean, ordea, erraldoi eta buruhandiek, dantza-plaza eta Akelarre txarangak girotuko dute hiria. Festak 21:30ean bukatuko dira, Bihotzaren erreketarekin.