Betea zegoen Urduñako Foru Plaza atzo iluntzean. Ehunka herritar bildu ziren, hastear zeuden Otxomaioei ongietorria egiteko prest.
Nork bere erara eman zion hasiera festari. Haur eta guraso asko Udaletxearen azpian zeuden, buruhandi eta erraldoiekin jolasean, eta eskoletan eginiko plastikozko tronpeta koloretsuekin txarangako kideak imitatu nahian.
Gazteak, berriz, koadriletan banatuak zeuden, jaietarako uniformeak jantzita, oraindik kalimotxo edo garagardo orbanik gabe soinean.
Nagusienak, berriz, bankuetan eserita, elkarrekin hitz egiten eta, gaueko bederatziak hurbildu ahala, udaletxeko balkoira so.
Fandiñoren hitzak
Ordu horretan atera zen aurtengo pregoilaria den Ivan Fandiño balkoira. Toreatzaile ospetsua euskaraz zuzendu zen herritarrei. “Aupa Urduña! Oso azkar egingo dut, Otxomaioak ahalik eta lasterren hasi daitezen. Lehenik eta behin eskerrak eman nahiko nieke nitaz gogoratu diren guztiei. Urduñarra izanda behar bat da Urduñaren izena munduan zabaltzea, eta ohore bat Bizkaikoa eta Euskal Herrikoa izatea. Harro nago urduñarra izateaz. Gora Euskadi! Gora Urduña! Gora Otxomaio!”.
Egon zen, baina, Fandiño pregoilaria izatearekiko desadostasuna adierazi zuenik ere. Hori erakusten zuen Udaletxeko balkoiaren beste aldean eskegi zuten pankartak. “Tortura kulturatik kanpora! Zezenketak sadismoa dira” zioen.
Jarraian jaurti zen suziria, eta festa piztu. Txarangak herriko kaleetan barrena bideratu zuen jendea, txosnak irekitzen ziren bitartean.
Sei festa egun, ospatzeke
Otxomaioak, baina, hasi baino ez dira egin. Oraindik sei festa egun biziko baititu Urduñak, gaurtik maiatzaren 17ra bitartean. Gaur agintarien segizioaren desfilearekin emango zaio hasiera egunari, 10:30ean. Bandaren kontzertua, kale antzerkia zein pilota partiduak egongo dira gero.
Bihar, berriz, Umeen eguna izango da, eta umeentzako entzierroa eta herri bazkaria egongo dira, besteak beste. Gau partean, berriz, kontzertuak egongo dira Gaztetxean, Revolta Permanent rap taldearen, Aldats erromeriaren eta oraindik konfirmatu gabeko beste talde baten eskutik.