Alondegia Gizarte Etxea izango da apirilaren bigarren hamabostalditik aurrera. Urte hasieran mugitu zuten Foru Plazatik Alondegira Turismo bulegoa. Apirilean, ludoteka eta Gaztegune zerbitzua gehituko zaizkio eraikinari, Alondegia gizarte etxe bihurtuz. Horrez gain, herritarrek erabiltzeko 3 gela jarriko dituzte eskura.
Beheko solairuan ekitaldiak antolatzeko areto bat egongo da, proiektore eta soinu ekipo batekin lagundua. Solairuen arteko gunean, entsegu lokalak mantenduko dituzte, orain arte bezala Liborio kolektiboak kudeatuko ditu. Lehenengo pisuan, berriz, ludoteka eta Gaztegunea jarriko dituzte martxan. Bigarren solairuan ekintza puntualetarako (bilerak, ekitaldiak, erakusketak...) bi areto egongo dira. Hirugarren solairuak sukaldea izaten jarraituko du, ikastaro eta ekintza ezberdinei kabida emanez.
Alondegia gizarte etxe bihurtzeko martxoan zehar egin dituzte obrak. Urduñako udalaren arabera, espazioaren banaketa eta azpiegitura nabarmen hobetu dute. Horretarako, 2015eko aurrekontuetatik 20.000 euro bideratu dira. Zehazki, beheko solairuko ateak kentzea, sarrera nagusian ate automatiko bat ipintzea, elkarbizitzarako edo harrera egiteko gunea egokitzea, berogailu eta argiztapen sistema moldatzea... dira egindako lanak.
Urduñako norbanako zein elkarteek Alondegia erabili nahi izanez gero, Herritarren Arreta Bulegoetan egin beharko dute eskaera. Horretarako, ordea, NIF/NAN, helbidea, telefonoa eta garatu nahi den ekintzaren inguruko informazioa zehaztu beharko dira, azpiegiturak erabiltzeko egun eta ordu zehatzak barne. Areto berdina erabiltzeko eskaera bat baino gehiago balego, udaletxean aurkeztutako eskaera orrian aurretik dagoen zenbakiak izango du lehentasuna. Erabiltzaileek egun bat lehenago eskuratu ahalko dituzte Alondegiko giltzak. Azpiegituretan kalterik antzemango balitz, beraiek izango dira erantzuleak.