Harilka elkarteak berdintasunaren inguruan urduñarrak formatzeko lau tailer eskainiko ditu apirilean zehar. Saioak irekiak dira, edonork hartu lezake parte. Horretarako, ordea, kulturaurduna@gmail.com helbidean edo Urduñako Kultur etxean eman beharko da izena apirilaren 13tik 17ra. Saio guztiak gazteleraz egingo dira. Lehenbiziko tailerrak "Fundamentos de la igualdad de género" du izena, eta apirilaren 13an egingo dute, 17:30etatik 19:00etara. Bigarren saioa apirilaren 15ean izango da, eta emakumeen oinarrizko eskubideak izango ditu ardatz. Hirugarren tailerra apirilaren 20an eskainiko dute; legeria eta berdintasun politikak aztertuko dituztelarik. Azkenengo formakuntza saioa praktikoa izango da, etorkizunerako ideiak ateratzea izango baitute helburu apirilaren 22an. Harilkatik adierazi dutenez, tailerretako partaide kopurua mugatua da (20 lagun), horregatik, aurrez izena-ematearen garrantzia azpimarratu dute. Egitasmoa Urduñako udaleko Berdintasun Arloarekin elkarlanean garatu dute.