Maiatzaren 16an egingo da, gaueko 22:00etan hasita. Bi ibilbide izango ditu, luzea 27 km-koa eta laburra 13,5 km-koa.
Urduñako Gualdetxu MBT taldeak proba berezia antolatu du beste urte batez Otxomaio jaien harira: Urduña Hiria Gau Martxa. Aurten maiatzaren 16an izango da eta izenak dioen moduan bere berezitasun handiena da gauez egiten dela.
Antoilatzaileen esanetan “proba ezberdin bat” egitea da euren asmoa, eta jenderik ez da faltako seguruenik, gero eta ohikoagoa delako gauez mendiko kirolak praktikatzea.
Bi ibilbide
Probak bi ibilbide izango ditu, aurreko urteetan bezala. Ibilbide luzeak 27 km-koa izango da eta tarte teknikoak izango ditu. Horri gehitu behar zaio gauez ibiltzeak dakarren zailtasuna.
Ibilbide laburrak, berriz 13,5 km izango ditu eta hain trebatuta ez daudenentzat egokia da. Biak abiatuko dira Urduñako plazatik eta Gorobel azpiko eta Larruazabaleko bide eta pistetatik joango dira.
Barbakoa
Zerbitzuei dagokienez, anoa-puntu bate gongo da bi ibilbidetan, bai eta helmugan ere. Gainera, parte-hartzaile guztientzat barbakoa bat egingo da proba amaitu ostean Foru Plazan. Dutxak ere izango dira eta opariak zozketatuko dira txirrindularien artean. Parte hartzeko ezinbestekoak izango dira atzeko zein aurreko argia, kaskoa eta sakelako telefonoa.
Argazki-lehiaketa
Argazki-lehiaketa ere antolatu dute martxaren harira. Maiatzaren 24ra bitartean aurkeztu ahal izango dira lanak gualdetxumbt@gmail.com helbidera bidaliz, datu pertsonalak adierazita. 100 eta 50 euroko saria egongo da 1. eta 2. sailkatuentzat.