17. Gazte Eguna egingo duzue eta zuk 18 urte dituzu, noiz hasi zinen parte hartzen?
Nire lehenengo Gazte Eguna asanbladako kide gisa 13. Gazte Eguna izan zen. Esperientzia ezberdina da barrutik ikustea, zuk prestatzen duzulako guztia, lanean zaude... azken hilabete horretan lan eta lan egiten dugu eguna ahalik eta hoberen atera dadin.
Aurtengo egitarauari buruz zer esan dezakezu?
Aldaketa batzuk egon dira. Gaztetxean egin behar ditugun kontzertuetan Aizkorakada jarri genuen kartelean baina ezin dira etorri eta bere ordez Patx&Ran arituko dira.
Azken orduko beste aldaketa garrantzitsua izan dugu. Atzokoa, hain zuzen. Gaueko kontzertuetan Governors-ek jo ordez Madrilgo Kaos Urbano taldeak joko du.
Dena den nik azpimarratuko nuke urtero bezala herri bazkaria egongo dela plazan eta goizeko ikuskizunak ere interesgarriak izango direla; Slackline erakustaldia egongo baita. 3x3 futbol areto txapelketa ere egongo da, gainera eskalada txapelketaren finala jokatuko da Gaztetxean.
Jendeak normalean garrantzia gehiago ematen die gaueko kontzertuei. Zentzu horretan Kaos Urbano ez ezik Akerbeltz eta Habemus Papam taldeek ere joko dute.
17 edizio asko dira, aurreko belaunaldiekin harremana duzue?
Belaunaldi aldaketak eman dira Urduñako Gazte Asanbladan baina belaunaldi ezberdinak mantentzen dira. Lehen zegoen belaunaldiko jende ugarik jarraitzen du. Gutxi gara baina batzuk mantentzen dira.
Planteamendua aldatu duzue Gazte Egunari dagokionez?
Guk ohitura moduan hartzen dugu eta helburua da herriko gazteak zein eskualdeko gazteak Urduñara hurbiltzea eta hemen antolatzen ditugun ekintzetan parte hartzea, finean, jai eguna izatea herrian.
Gazte Asanbladaren urteurrena ospatzea eta jendea lokaletatik ateratzea.
Zerbait berezia egiten duzue Gazte Eguna baino lehen edo ondoren?
Oro har Gazte Eguna baino lehen, aste bat edo bi lehenago, egiten dugu batzar irekia, berez, Gazte Egunean lagundu nahi dutenek aukera hori izan dezaten. Guztion artean egin dezagun.
Gero bakoitzak arduraren bat hartzen du. Taldetan banatzen gara: ikuskizunetarako, ekitaldia prestatzeko...
Eta bertan asanbladakoa garenok eta nahi duenak parte hartzen dugu.
Betiko lez lelo bat prestatu dugu eta aurten gure mezua da: "Asanblada oinarri, 17 aldarri".
Gure asmoa da lanean jarraitzea. Gazte Egunaren ostean Gaztetxeak 3 urte beteko ditu eta astebeteko egitaraua prestatu dugu.
Astelehenean txilarra erabiliz erratzak egiten ikasiko dugu, asteartean hitzaldia dago, asteazkenean Korrikak Urduña zeharkatuko du eta aprobetxatuko dugu txokolatea emateko Gaztetxean eta hurrengo egunean askaria eta poteoa antolatuko dugu, ostiralean kontzertuak...
Aste horretan Gaztetxearen 3. urteurrena ospatuko dugu.