Korrikaren etorrera dela-eta, Euskararen Astea antolatu dute Urduñako Euskara Batzordea osatzen duten eragileek. Guztira 7 ekintza egongo dira. Martxoaren 25ean hasiko da, eta martxoak 29a bitarte makina bat ekitaldi egongo dira. Horien artean daude ikus-entzunezkoen proiekzioak, korrika txikia, dantza-plaza...
Korrikaren bisita martxoaren 25ean 06:00ak aldera jasoko du Urduñak. Antigua auzotik sartuko da, hiria zeharkatu ondoren Amurriora gerturatzeko. Bidean, baina, ekitaldi bereziak utziko ditu. Antzinako Amaren eliza inguruan, esaterako, suziriekin emango diote ongietorria. Urduñako Gazte Asanbladak, aldiz, Korrikak hiria agurtzen duenerako txokolatada beroa prest izango du nahi duen ororentzat gaztetxean.
Egitarau berezia
Martxoaren 26an, berriz, Korrikako edizio ezberdinek Urduñan utzitako irudiak ikusteko aukera egongo da Alondegian. Horretarako, bideo eta argazki proiekzioa antolatu dute, 18:00etan hasiko dena.
Urduñako ikastetxeak ere batuko dira ekimenera, martxoaren 27an egingo baitute “Korrika txikia”. Ez da hori izango, ordea, ostiraleko ekintza bakarra, Foru plazan txokolatada eta dantza plaza egingo baitute arratsaldean.
Larunbatean bukatuko da Urduñako Euskararen Astea, 13:30ean egingo duten Euskal kantu herrikoien emanaldiarekin. Asteari bukaera borobila eman asmoz, martxoaren 29an Bilbon egingo den amaiera festara bertaratzeko deia egin du Euskara Batzordeak.