Hainbat herritarrek "Urdukonpost" ekimena sortu dute Urduñan. Urte bat lanean eman ondoren martxoan abiatuko dute konposta auzolanean egiteko egitasmoa. Oraingoz 10 familiak hartuko dute parte, baina aurrera begira egitasmoa handitzea dute helburu: "Funtzionatzen badu proiektua familia gehiagotara zabaltzea da gure ideia", diote David Hosking eta Itziar Biguri sustatzaileek.
Biztanleko egunero kilo bat zabor sortzen da, %40 materia organikoa delarik. Horren jakitun, hondakinak nola aprobetxa zitezkeen galdetu zioten haien buruari, eta horrela jaio da "Urdukonpost". Trasantiagoko zelaian kokatuko dute konposta egiteko edukiontzia, eta partaide bakoitzak beharrezko baliabideak izango ditu eskura: "Sistema erraza da, 4 pausu dira: etxeetako materia organikoa gordetzea, konponsterara eramatea, nahastea eta estrukturantea botatzea (materia organiko lehorra, egur lehor xehetua kasu)". Horretarako azpiegitura -edukiontzia- eta material lehor xehetua udalak utziko die. “Pala eta materiala ondo nahasteko aireatzaile bat ere behar da”, erantsi dute.
"Konpostatzea zaborra aprobetxatu, kudeatu eta murrizteko era bat da. Materia organikoa ongarri bihurtuko dugu", diote. Eskualdean herritarrek abiatu duten lehen ekimena da, nahiz eta Euskal Herrian eta beste herrialde batzuetan aski ezaguna den.
Konpostaren onurak
Ekologikoki, ekonomikoki eta pedagogikoki onurak baion ez dizkiote ikusten sustatzaileek. Ekologikoki jasangarritasunaren alde egiten dutela diote, lurrari erabilitakoa itzuli egiten zaiolako, bizitzaren zirkulua itxiz. "Horrez gain, zabortegietara eramateko behar den erregaia saihestu egiten da". Garrantzitsuena, baina, normalean bota egiten diren gauzekin konposta egiten dutela da, lurrei oso produktu erabilgarria eskainiz. Izan ere, bestela Gasteizko Gardelegi zabortegira eramaten dira. Pedagogikoki ere estrategikotzat dute: "Oso garrantzitsua da etorkizuneko belaunaldiek ingurumenarekiko ardura izatea. Janaria zentzu zabalago batean ulertzea da". Horretarako, barazkien azalak, arrainen hezurrak, tintarik gabeko kartoi edo papera, arraultz azalak, kafe hondarrak... erabiliko dituzte.
Lortzen duten konposta eskatzen duten herritarrei emango diete, “ez dira zertan Urdukonponsteko kideak izan behar”.
Hosking eta Biguriren arabera ilusio askorekin heldu diote erronakri: “Oso garrantzitsua da lurrarekin lan egiten duten herritarrak kontzientzia, ongarria lortzeko eta haien zaborrak kudeatzeko aukera gehiago daudela jakin dezaten”.