Urduñako EAJk Aduanarekin EH Bilduk, gobernu taldeak, egindako kudeaketa kritikatu du hedabideetan: "Ez dute gurekin ezertarako kontatu, nahiz eta oposizioko indar nagusia izan. Urduñarentzat eta udalarentzat oso garrantzitsua da bainuetxea, jarduera ekonomikoa eta turistikoa indartu egiten baitu".
Bainuetxearen kudeaketak aurrera egin asmoz, lizitazioa prestatzen ari da Urduñako udala. Iñaki Cuadra bozeramaile jeltzalea planteamenduarekiko mesfidati azaldu da: "Prentsaren bidez jaso dugu informazioa. Gaia jorratzeko lan talde bat sortuko dutela esan dute, baina ez dakigu ezer, gobernu taldearen arabera alderdi politikoak eta udal teknikariak hartuko dute parte. Gure inpresioa, aurrekontuekin gertatu den bezala batzorde bat deituko dutela da, haien proposamena eraman eta ekarpenak egiteko tartea uzteko, nahiz eta amaieran ez duten proposamenik onartuko". Jeltzaleen aburuz helburua gardentasunaren irudia ematea da, "gardentasuna eta parte-hartzea irudikatu nahi dute, errealitatean gehiengo absolutuaz baliatzen diren bitartean".
Komunikabideei egindako adierazpenetan Iñaki Cuadrak lizitazio prozesua hilabete honetan abiatzea arriskutsutzat jo du. "Nahi dutena arazo larri hau ahalik eta lasterren kentzea da, udal hauteskundeak iritsi baino lehen. Tanto bat apuntatu nahi dute, baina ondo aterako ote den zalantzan dugu".
Kontrako probak agerian, EH Bilduren ustez
EH Bilduk gezurtatu egin du jeltzaleen leporaketa. Batetik, Aduana eraikinaren lizitazioa landu diren sei informazio batzordetako datak argitaratu ditu, udaleko talde politikoekin egindako bileretan txostenak aurkeztu direla frogatuz.
Ildo beretik, aurrekontuen prestaketa prozesuko bileren berri eman dute. Kronologia eta informazio guztia haien webgunean jarri dute. "Urduñako EAJk, egia aitortu beharko luke, bere arduragabekeria EH Bilduren gobernu taldeari leporatu beharrean".