Sindikatu abertzalearen hitzetan, Montenegro Taldearen kudeaketa ezin txarragoa izan da hasieratik, bai ustiapenari zein giza-baliabideei dagokienez.
Ana Montenegro buru izaki, neurri desegokiak hartu dira, eta, instalazioak behar moduan mantendu ez direnez, bainuetxea bera itxita egon zen sei hilabete baino gehiagoz. Horrenbestez, ezin ulertuzko zorrak sortu dira, eraikina berriztatu beharra dago orain, eta langileen berehalako kaleratzea aurreikusten dute.
Gizarte Segurantzako Diruzaintzaren jarrera ere salagarria dela dio LABek, Montenegrok utzitako zorra kobratzea beste ardurarik ez duelako, negozioaren ustiapenerako aukerarik proposatu gabe.
Bestalde, sindikatuak ez du ulertzen Administrazio Konkurtsalak aldeen arteko negoziazioan izandako jarrera. Izan ere, ez dira kontuan hartu benetako balorazioa egiteko beharrezko datuak, eta itxaropen faltsuak eman zaizkie langileei.
Azkenik, Udalaren jokabideak ere huts egin diela adierazi dute, instituzioaren egoera finantzarioari eta ondorio ekonomikoei eman baitiete lehentasuna, bainuetxe-hoteleko langileen lanpostuen gainetik.
Horregatik guztiagatik LAB sindikatuak alde guztiei benetako ahaleginak egitea eskatzen die, betiere bainuetxearen itxiera ekidite eta lanpostuei euste aldera