Urduñako udalak Euskadiko eta Kataluniako selekzioen arteko futbol partida ikusteko autobusa antolatu du. Abenduaren 28an 20:30ean izango da futbolarien arteko norgehiagoka. Autobusa, aldiz, 18:00etan abiatuko da suhiltzaileetatik. Itzulera Bilbotik 22:30ean izango da.
Izen-ematea kultur etxean egin beharko da abenduaren 22a baino lehen. Bidaiaren prezioa 5 eurokoa izango da. Partidarako sarrera ez dago barne. Interesa duen orok Kultur etxetik pasa beharko du apuntatzera. Horretarako ordutegia 9:00etatik 15:00etara da. Urduñako udalak adierazi duenez 16 urtez beherakoek gurasoen baimena eraman beharko dute.
Futbol partida San Mameseko estadioan izango da. Abenduaren 27an emakumezkoek jokatuko dute 17:30ean. Hurrengo egunean, berriz, abenduaren 28an, gizonezko taldeak zelairatuko dira lagunarteko partida jolastu asmoz. Ostiralean jarri ziren sarrerak salgai. Hedabideek zabaldu dutenez hiru egunetan aforoaren %40 saldu dute.
1915eko urtarrilaren 3an jolastu zuten lehenbizikoz Euskadi-Catalunya selekzioek San Mames estadioan.