Ai Laket!! elkarteak dinamizatuta eta Urduñako udal zerbitzu sozialek antolaturik, drogen zentzuzko kontsumoa abiapuntutzat hartuko duen tailerra egingo da gaur, 18:30ean, Gaztetxean. Modu erabat dinamikoan, parte-hartzaileek informazioa jaso ez ezik, euren kezkak plazaratzeko aukera ere izango dute.
Jarduerak helburu bikoitza izango du, alde batetik, drogen arriskuzko kontsumoa gutxitzea; bestetik, sustantzia horiekiko atxikimendua saihestea. Horretarako, galdera hau jarriko da mahai gainean: “Drogak zentzuz kontsumitu ahal dira?”.
Lehenik eta behin, alkohola izango da hizpide, eta, gero, kalamuaren nahiz beste droga kimikoen inguruan arituko dira bertaratutakoak.
Ondoren, norberak hausnarketa egin beharko du, alegia, bakoitzak bere ideiak argitzea da asmoa, azkenik, guztion artean estrategia komunak adostu arte. “Posible da zentzuz kontsumitzea, baina pertsonaren araberakoa da, hau da, bakoitzak diskurtso bat izan behar du, bere aukerekin, bere ahuleziekin… Eta ze estrategia jartzen duen erdian, ba, pixka bat saihesteko arazoa”, adierazi du Ai Laket!! elkarteko kide batek.