Urduñako Txarlazo Mendi taldeak bere 50. urteurrena ospatzen ari da aurten eta horretarako hainbat jarduera antolatu dituzte urrian zehar.
Urriaren 9an hasiera emango diote ekintzaz jositako hilabete horri Juanjo Urbizuren hitzaldiarekin. Juanjo Urbizu “Monterapia” liburuaren idazlea da eta mendia kirol hutsa baino harago, bizi kalitatea hobetzeko tresna ere badela azalduko du.
Hitzaldiekin jarraituz, urriaren 16an, osteguna, Alex Txikon alpinista lemoarra bertaratuko da Urduñara “Bizitza osoa mendiari lotuta” izeneko hitzaldiarekin.
Azkenik, urriaren 25ean, Iñaki Ochoa de Olzaren inguruko dokumental bat proiektatuko da, “La voz de Iñaki”. Horren ostean Annapurnan hildako alpinista euskaldun horren “SOS-Himalaya” fundazioa aurkeztuko da.
Ekintza guztiak Urduñako kultur etxean egingo dira, arratsaldeko 19:30tan beti.
XI. Mendi martxa
Bestalde, urriaren 12an, XI. Urduñako mendi ibilaldia egingo dute. Ohikoa den moduan, bi ibilbide egongo dira. Ibilbide luzea goizeko 8:00etan abiatuko da Foru Plazatik eta 30 kilometroko luzera izango du; Beratxa, Unza, Santiago, Tertanga eta Gartxeta zeharkatuko du. 15 kilometroko ibilbide motza goizeko 10:00etan abiatuko da toki beretik. Beratxa eta Artomañatik igaroko da, besteak beste. Inskripzioa 2 eurokoa izango da.
50. urteurreneko ospakizunak abenduan burutzeko asmoa duten irteera sozial batekin amaituko dituzte. Irteera horretara Bizkaiko mendi talde guztiei luzatuko diete gonbidapena eta ibilbide labur baten ostean bazkaria antolatuko dute parte-hartzaile guztiekin batera.
1964tik dabil martxan Txarlazo mendi taldea eta, urte batzuk geldirik egon ostean, 2005. urtetik aurrera sasoi betean doa aurrera euren ekintzetara geroz eta jende gehiago erakarriz.
Hilabetean behin irteera bat antolatzen dute eta urtean birritan gutxienez irteera bereziak antolatzen dituzte sagardotegi zein upategi batera klubeko kideen artean harremanak estutzeko asmoz. Hortaz gain, orain dela gutxi arte ere eskalada eskola txiki bat izan dute.