aiaraldea.eus

Aparkalekuen arazoari aurre egiteko azterketa eta moldaketak planteatu dituzte

Erabiltzailearen aurpegia Izar Mendiguren Cosgaya  Urduña

Urduñarrek Alde Zaharrean aparkatzeko arazoak dituztela-eta, azterketa egin du udalak. Orain, aparkalekuen arazoak konpontzeko prozesua abiatuko dute. Alabaina, Alde Zaharra edertzeko planean aurreikusi bezala Urduñako harresiaren inguruan zeuden aparkatzeko lekuak aldatu egingo dituzte urritik aurrera.

Urduñarrek Alde Zaharrean aparkatzeko arazoak dituztela-eta, azterketa egin du udalak. Orain, aparkalekuen arazoak konpontzeko prozesua abiatuko dute. Alabaina, Alde Zaharra edertzeko planean aurreikusi bezala Urduñako harresiaren inguruan zeuden aparkatzeko lekuak aldatu egingo dituzte urritik aurrera.

Guztira, harresiaren inguruko 12 leku kendu eta 33 jarriko dituzte. Izan ere, nola Ortes de Velasko Jauregiaren kalean hala harresiaren inguruan seina plaza kenduko dituzte. Horren ordez, Juan de Garay kalean 24 leku egokituko dituzte, eta anbulatorioan beste bederatzi.

La Posada guneko obrak

Bestalde, La Posada ezizenez ezagunagoa den bidegurutzean aurki hasiko dituzte obrak. Helburua, haur eskola, herri eskola eta adin nagusien egoitzarako oinezkoentzako bidea seguruagoa bilakatzea da.

Horretarako, bi eraikin bota beharko dituzte. Irabazitako espazioarekin Nafarroa eta Zageras kalean espaloia handituko dute, eta semaforo bidez erregulatuta dagoen norabide bakarreko errepidea bi noranzkodun bihurtu.

Zageras kaleko aparkalekua ere egokituko dute, 40 ibilgailurentzako lekua eskainiz. Proiektuak ekarriko dituen aldaketek egun dauden hiru semaforoen desagertzea ekarriko du, baita Urduñako sarbide nagusia aldatzea ere.

Autokarabanentzako parkinga

Zezen plaza inguruan, ordea, autokarabanentzako parkinga egingo dute. Horretarako, ideien lehiaketa abiatu du Urduñederrak. Udalak adierazi duenez, inguruari erabilera ematea da helburua, abandonatu samar baitago.

Erantsi dutenez, Gurutze Gorriaren eraikinaren erabilera egitasmoaren baitan txertatzeko aukera izango dute lehiaketara aurkezten direnek. Horretarako epea azaroaren 15ean bukatuko da.

Aparkalekuen azterketa

Leber enpresak egindako ikerketaren arabera, Urduñako hiriguneetan autoak uzteko lekuetan superabita dago, ibilgailuentzako gune guztietan plaza libreak baitaude.

Urduñako udalak Alde Zaharrean bizi diren 400 lagunek bertatik kanpo aparkatu behar zutelako abiatu zuen azterketa, beharrezkoa balitz neurriak hartzeko helburuarekin.

Alabaina, Agua Saladako parkingaren %72 hutsik egoten dela dio azterketak. Behaketa egiteko ibilgailuen matrikulak baliatu dituzte. Foru Plaza eta Gran Vía lotzen dituen kalean ere arazoak detektatu dituzte, bainuetxearen atzealdeko kalea merkatariek zama lanetarako erabiltzen baitute eta bertan pilatzen baitira gaizki aparkatzen diren auto gehienak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa