Iraileko udalbatza egin zuten atzo Urduñan. Udal langileen produktibitate osagarriaren inguruan Adminsitrazioarekiko Auzitegiaren sententzia jakinarazi zuten. "Bere garaian udalbatzatik pasa eta onartu zen gaia da", erantsi zuen Karlos Arranz alkateak. Izan ere, 2012az geroztik udal langileek ez dute aparteko ordain-saririk jasotzen: "2012tik ordainketarik ez egitea erabaki zenez sententziak baliogabetzen duen bakarra akordioa da. Udal langileek, beraz, paga extrardinatorioa jaso gabe jarraitzen dute". Sententziak dioenaren alde bozkatu zuten ordezkari politiko guztiek; EH Bilduk eta EAJk, PPko zinegotzia ez baizen azaldu.
Alokairu soziala
Bestalde, Foru Plazako 9B zenbakian kokatutako udal azoka izeneko eraikinean behar sozialetarako alokairu sistema ezartzeko aukera onartu dute. Azaldu zutenez, helburua prezio babestutako prezioetan esleitu gabeko bi etxebizitzaren okupazioa salmenta zein erosteko aukeradun errentamendu kontratuaren bidez bermatzea da. Hain zuzen ere, bi etxebizitza horiek alokairura bideratzeko aukera planteatu zuen Urduñederrak. Horrek, egungo akordioa moldatzea ekarriko luke. Proposamena EAJ eta EH Bilduren aldeko bozkekin onartu zen. Orain, baldintzak zehaztea izango da hurrengo pausua. Hori Ongizateko Zerbitzuetatik bideratuko dute.
Udalaren landa lurrak erabiltzeko ordenantza
Urduña Hiriko udalaren jabetzapeko landa lurreko ondasunen ustiapena arautzen duen ordenantza ere izan zuten hizpide. Herritar batek alegazioa aurkeztu zuela-eta landu zuten gaia. Gobernu taldearen arabera, lehen sektorean diharduten pertsonekin elkartu dira, eta herritarrei ere aurkeztu zaie aurrez udalbatzan onartutako araudia. "Udalaren apustua gazte eta profesionalena da", nabarmendu zuten. Horren harira, aurki irekiko da lurrak erabiltzeko eskaerak egiteko epea, azaroaren erdialderarte luzatuko dena.
Bide garbiketa
Urduñako bideak garbitzeaz arduratzen den enpresari kontratua urte batez luzatu diote, urriaren 19 arte. "Udalaren kontraturik potenteenetakoa da, legeagintaldi hasieran enpresarekin %20ko deskontua adostu genuen, legeak onartzen zuen bitartean kontratua luzatzeko konpromisoarekin", argitu zuen Arranzek. Oraingoa azken prorroga izango da, hauteskundeak tartean daudelako. HOrregatik, legagintzaldi berrian bideen garbiketaren kudeaketa batzordeetan lantzea proposatu zuen EH Bilduk. Bozkatzeko unean denek alde egin zuten, hortaz, kontratuaren luzapena onartu egin zen.