Urduñako The Spirit Tuning klubak tuning topaketa egingo du larunbat honetan Mariaren Lagundian. Hitzordua 10:00etan jarri dute, baina egun osoan zehar egongo da tuneatutako kotxeak ikusteko aukera, baita jolasetaz eta erakustaldietaz gozatzekoa ere. Sarrera doakoa izango da. "Ez dakigu zenbat jende etorriko den izen-ematea ez delako beharrezko, baina 30-50 espero ditugu", adierazi du antolatzen aritu den Jose Luis De Diosek. Topaketen helburua tuningaren mundua ezagutaraztea da, "eta partaideak gozaraztea". Aurtengoa hamargarren edizioa izango da: "Urduñan bi urtero egiten dugu, Arevalon (Avila) eta Urduñan txandaka antolatzen baitugu topaketa". Horregatik, talde antolatzaileak aiaraldearrak ez ezik, Palentziarrak eta Santanderrekoak ere elkartzen ditu. "The Spirit Tuning Kluba 14 kidek osatzen dugu, baina ekitaldi hau prestatzen 8-9 aritu gara, tartean, kanpoko jendea ere", erantsi du.
Erakustaldi ugari
Txikienek ere izango dute autoez gozatzeko aukera. Izan ere, 12:00etatik aurrera scalextric-ean ibiltzeko parada izango dute, edo bestelako jolasetan aritzekoa: "Zapiaren jolasa, futbolina, zokor bilketa... ere egingo dugu". Partaideentzako, aldiz, makarroi jana egingo dute 14:00etan. Arratsaldean jolasak izango dira nagusi, 18:00eta bingoa egingo baitute, eta 19:30ean helduentzako jolasak. 21:00etan abiatuko da gaueko erakustaldia: "Tuneatutako autoek neoizko argiak piztuko dituzte eta ondoren Foru Plazara abiatuko dira, 22:00etan ibilgailuen erakusketa egongo baita bertan. Gutxi gora behera 20 minutu egongo dira".