Asteburu honetan ospatuko dira Antigua auzoan Antzinako jaiak. Ostiraletik igandera egitarau oparoa prestatu dute. Bihar jaurtiko dute txupinazoa, 17:30ean. Ondoren, umeentzako jokoak egongo dira. Antolatzaileen arabera, jolasetako batzuk ohikoak izango dira, eta beste batzuk bizikletaz egitekoak. Iluntzean, ordea, txokolatadaz gozatzeko aukera egongo da. Eta, buruhandiekin korrika egitekoa. Gaua, aldiz, Dj Ra-k girotuko du.
Patata tortila txapelketa
Larunbatean ere egongo da zer egina. 11:00etan, esaterako, tipuladun patata tortila txapelketa egingo dute. Hiru kategoria bereiztu dituzte: helduena, adingabeena eta gazteena (16 urte artekoak). Aurkezten diren tortilarik onenek saria jasoko dute. Adierazi dutenez, jai batzordeak patatak, arraultzak eta tipulak emango ditu. Beste osagaiak parte hartzaileek eraman beharko dituzte. Patata tortilak 13:00etan aurkeztu beharko dira, epaileek frogatu ostean 14:00etan txosnan egingo duten dastaketari bide emateko.
Arratsaldean, berriz, mozorro lehiaketa eta magia emanaldia izango dira nagusi. Ondoren, herri afaria egingo dute auzokide eta hurbilekoentzat. Jaiei amaiera emateko, Dj Ra-rekin dantzaldia izango dute bertaratzen direnek.