Urduñako bigarren berdintasun plana abiatzear da. Uztailaren 14an aurkeztu zuten herritar eta elkarteen aurrean eta Emakunderen ekarpenak jaso ostean iraileko udalbatzan bozkatuko dute azken emaitza.
Apiriletik ekainera, 20 elkarrizketa, eztabaida saioak eta diagnostikoa egin dituzte, prozesu parte hartzaile eta inklusibo baten bidez. Bigarren berdintasun planaren baitan hainbat ekintza planteatu dituzte. Ekintzen bidez herritarrak kontzientziatzea izango dute helburu. Horretarako, ordea, urduñarren ahalegina ezinbestekoa izango dela nabarmendu dute. Aurreratu dutenez, adin guztiei zuzendutako hezkuntzak garrantzia handia hartuko du planean, haurrei ez ezik adin guztiei zuzenduko baitzaizkie jarduerak.
Bigarren berdintasun planak hiru ardatz izango ditu. Lehenengo helburua berdintasunaren aldeko plangintza indartu eta hobetzea izango da. Horretarako berdintasun teknikari bat kontratzea gomendatu dute, besteak beste. Edo, udaleko teknikari eta ordezkari politikoei planaren inguruko informazio saioak eskaintzea. Aurreikusitako beste neurri bat kontratu, dirulaguntza eta akordioetan berdintasunari garrantzia emango zaiola adierazten duten klausulak txertatzea da. Horretaz gain, aurrekontuetan generoaren ikuspuntua txertatzea ezinbestekotzat jo dute, baita berdintasuna sustatzeko ekintzak garatzeko koordinazio egitura baten beharra ere.