Uztailaren 25ean Santiago eguna ospatuko dute Txarlazo mendian. Urtero bezala, bi ekimen prestatu ditu mendi taldeak bertaratzen direnentzako. Festa 09:00etan hasiko da, Txarlazorako igoerarekin. Horretarako hitzordua 09:00etan jarri dute Foru plazan. Behin gailurrera iritsita hamaiketakoa egiteko aukera egongo da, txosnan edari eta pintxoak salduko baitituzte. 12:00etan Santiago omentzeko meza egingo dute. Ondoren, mendizerrako zelaietan egunpasa polit bat egiteko aukera egongo da.
Gertaera historikoa
Txarlazo Mendi taldeak azaldu duenez, historikoki garrantzitsua izan den eguna da Santiago eguna. Izan ere, Bigarren Errepublikako garaian tradizionalistek Urduñan ospatzen zuten, nazionalistak Txarlazo mendira igo eta bertan ekitaldi politikoa egiten zuten bitartean. "Gerra Zibilaren ondoren, frankismoan, Txarlazoko festak izaera familiarragoa hartu zuen", adierazi du Garrastatxu Landaluzek. "Urduña eta Losako biztanleak astoekin bertaratzen ziren, bazkaria eraman eta akordeoilari batek giroa berotzen zuelarik", erantsi du. 1964az geroztik Txarlazo Mendi taldeak antolatzen du festa.