Batzar administratiboen erregularizazio prozesuari ekin dio Urduñako udalak. Hala, finantzaketa modua zehaztu dute, udal aurrekontutik biztanleen araberako diru kopuru bat bideratuz. Bertan, betebeharrak eta eskubideak ere finkatu dituzte. Karlos Arranz alkatearen arabera orain arte ez zegoen zehaztuta zeren arabera esleitzen zen dirua: “Urtero 22.000 euro ematen ziren lau batzar administratiboei”. Aurten, 27.000 euro bideratuko dituzte. “Horrela, besteak beste, alkateen gastuak, Diputaziora bidaiak... kubritu ahalko dituzte”, zehaztu zuen udalbatzan alkateak. Errepideak atontzeko beste diru partida bat emango diete, espazio publikoetako azpiegitura ere hboetu dezaten. Horretaz gain, ordenantzaren aurretik beste akordio bat adostu dutela adierazi zuten, Batzar Adminstratiboek obren %50 diruzlaguntza jaso dezaten. “Horrek landa guneetako obra ilegalak jakitea erraztuko du”. Udalbatzan hasierako onarpenari bide eman zioten, ordenantza publikoki jarriko dute ikusteko. Alkatearen hitzetan elkarlanean egindako akordioa izan da, lau alkate eta idazkariekin bideratu baitute. Ostegunean onartu zen proposamena udalbatzan, EhBildu, PP eta EAJren aldeko bozkekin.
Ehiza araudia
Bestalde, Urduña-Larruazabal inguruko ehiza eremua zehazten duen ordenantza onartu zuten alderdien arteko adostasun osoarekin. Araudi berria 10 urtez egongo da indarrean. Horretaz gain, Nerbioi Ibaizabal eskualdearekin zerbitzu batzuk adostu dituzte. Horien artean daude zaborren bilketarako ikerketa tekniko, juridiko eta ekonomikoa. Batetik, eskualde mailan egingo dute, eta bestetik hirian. Era honetan, zerbitzua berritzerako orduan -2015ean- aukerarik egokiena baliatzeko azterketa egina izango dute. Bulego materialak... ere Nerbioi-Ibaizabal mankomunitatearekin erosiko dituzte. “Akordio honekin ez da ezer kontratatzen” , azaldu zuen alkateak udalbatzan. Bozketetan erabateko adostasuna nabarmendu zen alderdi politikoen artean, denek alde egin baizuten.
Etxez etxeko laguntza zerbitzua kontratatzeko esleipena ere onartu zuten. Prozedura irekiaren bidez egiten da, eta esleipenarako irizpide desberdinak zein eskaintza ekonomikorik abantailatsuena hartuko dituzte kontuan. Kontratua lau urterako izango da, eta milioi eta erdi euro inbertituko dira. Adierazi zutenez, zerbitzua euskaraz ere eskaintzeko neurriak hartu dituzte. EAJ, EhBildu eta Ppk alde bozkatu zuten.