Atzo egin zen Urduñako udalean maiatzeko udalbatza. Maite Durana EAJko zinegotziak kargua utzi zuen. Besteak beste, lur publikoen banaketaren ordenantza, Gorobel mendilerroko lurrak larratzeko dekretuaren prozesuaren hasiera, Lendoñobeitiko eskola, HAPOa eta txakurren ordenantza izan zituzten hizpide.
Karlos Arranz alkateak Villalba de Losakoekin izandako afera laburtu zuen. Ondoren, Gorobeleko mendizerrako lurrak erabiltzeko dekretuaren prozesua hastea erabaki zuten: "Orain arteko prozesua luzea eta garestia izan da. Hala ere, Bizkaiko Foru Aldundiak finantzatzen duenez, ez du udal kontuetan eragin". EAJk eta Bilduk alde bozkatu zuten, eta PPk kontra.
Ez zen hori izan, ordea, lurrei lotuta hartutako erabaki bakarra; udalaren jabetzakoak diren landa izaerako ondasunen aprobetxamendua arautzen duen ordenantzaren hasiera egitea onartu baizuten ordezkari politikoek.
Lendoñoko eskola
Lendoñobeitiko eskola herritarrena izango da berriro hemendik aurrera. Izan ere, Lendoñobeitiko eskola izeneko eraikina udalaren erakunde izateko baldintza iraungitzat jotzea erabaki zuten Bildu eta EAJren aldeko bozek; PP abstenitu egin baitzen. “Lendoñobeitikoa beti izan dena herriari itzultzea da, egokiena deritzotena egin dezaten”, erantsi zuen alkateak.
Bestalde, San Frantzisko eremuan etxebizitzak egiteko HAPOn moldaketa egiteko promotoreek egindako eskaerari argi berdea eman zion udalbatzak. “Eskaera espazio berean etxebizitza gehiago sartzeko da. Araua betetzen duenez udalak onartu egin du, ez baita Diputaziotik bideratzen”, erantsi zuen Arranzek.
Dena dela, Gobernu Taldeak Urduñan indarrean dagoen HAPOa hiriko errealitatearekin bat ez datorrela salatu zuen. Adierazi zutenez, duela zortzi urte onartu zen, 645 etxebizitza eraikitzeko. “Horietatik 12 soilik eraiki dira, beraz, 637 etxebizitza eraikitzea babesten du HAPOk. 8 urtetan 12 bakarrik egin badira ez du zentzurik indarean dagoen HAPOak”.
Hori dela eta, Hirigintza Antolamendurako Plan Orokorra berrikusteko beharra azpimarratu zuten. Horretarako, ordea, finantzaketa dute arazo; 300.000 euroko gastua suposatuko bailuke. Lehen, Bizkaiko Foru Aldundiak laguntzen zuen %80-90ean diruz. Orain, baina, ekarpen ekonomikoa nabarmen jaitsi da, 7.000 biztanle duen herria izateagatik gehienez 15.000€ jaso baititzake Urduñako udalak.