Alde Zaharra edertzeko plana abiatu du Urduñako udalak, Basquetourren bidez. Izan ere, Euskal Herriko hainbat txoko aukeratu dituzte egitasmoa gauzatzeko, horien artean, Urduña.
Aitor Elorduy arduradunaren hitzetan helburua bikoitza da. Batetik, herritarren bizi kalitatea hobetzea. Eta, bestetik, turismoari begira hiria erakargarriago bilakatzea.
35 ekintza
Guztira, 35 ekintza egingo dituzte. “Anbizio handiko ekintzak dauden arren, bideragarrienetatik hasi gara. Hots, aurrekontu gutxi behar dutenetatik”, adierazi du Elorduyk.
Hasteko, behin eta berriz errepikatzen ziren seinaleak kendu dituzte, Alde Zaharrean aparkatzea debekatuta dagoela ziotenak kasu. Horretaz gain, zaborrontzi batzuk lekuz aldatu dituzte: “Segurtasun aldetik leku desegokietan zeuden, herritarrentzat bertaratzeak arriskua suposatzen zuen”. Egindako beste jarduera bat, Foru plazako zaborrontziak margotzea izan da.
Maiatzaren 31 bitarte, balkoi eta fatxaden lehiaketa egingo dute. Ekimenaren antolatzaileak ACCOR merkatari elkartea, Urduñederra eta Urduñako Zaporeak izan dira. Hiru kategoriatan banatu dute txapelketa. Lehenengoak balkoiak, terrazak eta etxebizitza pribatuetako leihoak baloratuko ditu. Bigarrenak, eraikinak osotasunean; eta hirugarrenak ostalari eta merkatarien saltokiak. Erantsi dutenez, balkoi guztien argazkiak www.urduna.com webgunean jarriko dituzte ikusgai.
Bestalde, animalien kakak jasotzeko ontzi bereziak jarriko dituzte Foru plazan, Gernika inguruan eta Trasantiago etorbidean. Datozen hilabeteetan harresiaren inguruko aparkalekuak nora mugitu erabakiko dute, Mikel Deunako zaborrontziak tokiz aldatu, hiriko altzariak hirugarren adinekoentzat egokitu... Eta, Trasantiago inguruko baratzeetan panelak ipiniko dituzte, landareen izenekin
Horretaz gain, txakurrekin paseatzeko bideak seinaleekin markatuko dira.