Iragan ostegunean izandako osoko bilkuran aho batez onartu zen Gobernu Taldeak aurkeztutako 2014rako udal-aurrekontuaren proposamena. Bildu eta EAJ udal taldeek babesa eman zioten testuari, modu honetan taldeek komisioan hitzartutako proposamenari aho batez bide eman zioten, PP alderdiko zinegotzia ez zen bilkuran izan.
Legegintzaldiko lehenengo aurrekontua
Legegintzaldia honetan Urduñako udalak aurrekontuak aurkeztu dituen lehen urtea dugu. Orain arte udalak bizi izan duen egoera ekonomiko itogarriaren eraginez, aurrekonturik ez egitea erabaki zuen gobernu taldeak. Bildu koalizioak gehiengoa duen arren, udal ekonomia okerrak aurrekontu errealistak egitea eragozten zuela eta hartu zuen erabakia.
Bizkaiko Foru Aldundiarekin akordioa izenpetueta gero, egoera ekonomikoa bideratzea erdietsi du udalak. Egoera egonkortuta aurrekontuak egiteko unea heldu da. Hori dela eta Batzar Informatiboa deitu zuen Gobernu Taldeak, herritargoari aurrekontuen proposamena aurkezteko. Honen ostean hainbat negoziaketa egin izan dituzte udal taldeek, Gobernu Taldearen proposamenean hainbat moldaketa eginez.
Orotara, 4.500.000 euroko aurrekontua onartu dute, eta ohiko diru-sarreren eta gastuen artean dagoen tarte estuak diru gutxi utziko du inbertsioak gauzatzeko. Hala eta guztiz ere, kaleen konponketak eta Mugikortasun Azterketa abiatuko dute.
Gainontzeko ekimenak ere aztertu eta lehenetsi dituzte, zerrenda bat osatuz; hori dela eta, egoera ekonomikoak hobera egin ahala egitasmo horiek era mailakatuan jarriko dituzte abian.