80. hamarkadan, Urduñan euskal kultura eta abertzaletasuna bultzatzeko elkargunerik ez zegoela ikusita, hainbat herritarrek Mugalde Kultur Elkartea sortu zuten. Oraindik herrian ez zegoen euskal hiztun askorik, baina kementsu aritu ziren, eta oso harrera ona izan zuten.
Hainbat urtez ereindako lanaren fruitua jaso dute orain, eta egindako lana aitortu diete urduñarrek. Bixintxo Azkarraga elkartekidearen hitzetan, “Sinesten dugun herria egiten ari gara. Gogoratzen duzunean zenbat egin dugun, oso polita da, merezi du: herria, kultura, euskara, euskal herria, herritartasuna, elkartasuna, maitasuna…”.
25 urteotan askotariko ekimen eta jarduerak antolatu dituzte. Besteak beste, hitzaldi interesgarriak, ikastaroak, erakusketak, omenaldiak, kartel-lehiaketak, herri-krosa, oso arrakastatsua den Otxomaioetako herri-bazkaria –500 pertsonentzat– eta Gabonetan egiten den azoka.
Horrez gain, Urduñako beste elkarte batzuekin lanean dihardute, eta, hala behar denean, laguntza eskaintzen diete.
Gaur egun 75 kide daude elkartean. Azken asteak buru-belarri eman dituzte datozen egunetan ospatuko duten urteurrena antolatzen. Izan ere, egitarau oparoa prestatu dute martxoaren 19tik 22rako.
Hilaren 19an abiatuko dituzte urteurrenaren inguruko ekitaldiak Mugalde Kultur elkartekoek. Asteazkenean, txokolatada egingo dute 17:30ean. Ordu bat geroago, 18:30ean, ipuin-kontalaria egongo da, eta 19.30ean “Mugalde Libre” kontzentrazioa.
Biharamunean, 19:30ean, giza-eskubideei buruzko hitzaldia emango du Julen Arzuaga aretarrak, “Euskal Herria: derechos, libertad, paz” izenburupean.
Asteburuan festa giroa nagusituko da. Datorren ostiralean, esaterako, 20:00etan pintxo pote berezia egongo da Mugalde tabernan; argazki proiekzioa egingo dute. Eta, azkenik, Orozkoko Hilbete taldeak emanaldia eskainiko du.
Bestalde, larunbatean, egun osoz disfrutatzeko aukera egongo da. Goizean, 11:00etan, mural herrikoia egingo da Foru plazan. Eguerdiko ordu batetan omenaldia egingo da Mugalden eta, ondoren, poteoari hasiera emango zaio, elektrotxarangaren erritmoaz lagunduta. 15:00etan herri-bazkaria egongo da mojen ikastetxean eta, gauean, parrandazaleenek hiru kontzertuz gozatzeko parada izango dute: The Potes, Versen eta DJ Bull.
[video:http://youtu.be/mPSPW4dFEKI]