Ivan Fandiñok urteko zezenkaririk onenaren saria eskuratu du bigarren urtez jarraian Morante de La Puebla, El juli eta Miguel Angel Pereraren aurretik.
Radio Nacionaleko Clarín saioak antolatutako tauromakia sariek 46. edizioa egin dute eta Urduñako toreatzaileaz gain Miura ganadutegia Urrezko Burdin Markarekin ere saritu dute. Juan Jose Padillak ere aipamen berezia izan du zezenketen inguruko saririk garrantzitsuenetan.
Urduñarrak, toreatzailerik sasoikoenaren saria jaso du bigarren urtez eta hori dela eta tauromakiaren historian toreatzaile ospetsuenekin batera ageri da. Oso gutxi izan baitira bi urtez jarraian saritu dituzten zezenkariak, Espartaco, Enrique ponce edota El Juli dira horietako azkenak.
Zaletuen zein kritikaren onespena
Zezenketen inguruko Clarín irratsaioan zaleen zein espainiar eta frantziar kritiko espezialitatuen babesa izan zuen Fandiñok saria jasotzerako unean; espainiar zein frantziar estatuetan eginiko zezenketak kontuan hartu dituzte Ivan urteko toreatzailerik onena izendatzeko unean.
Faena asko izan ditu aurten eta besteak beste Madril, Iruñea, Bilbo, Valentzia, Logroño edota Salamancako plazetan aritu izan da toreatzen; baita Mont de Marsan, Dax edotan Baionan ere, azken plaza honetan bakarrik aritu zelarik.