Adi Emakume Taldeak antolatutako ekimenaren barruan Senegalgo eta Paraguaiko jakiak prestatu eta dastatzeko aukera egongo da. Hitzorduak azaroaren 16an eta abenduaren 14an (larunbata) izango dira, hurrenez hurren.
Aukera anitz eskaintzen dituen ekintza horren bidez bizitzaren alderdi asko jorratu nahi dira. Batetik, aipatu bi herrialdeetako ohiturekin lotura zuzena izango du tailerrak eta, bestetik, emakumearekin. Helburu bat baino gehiago izango du, beraz. Hala, sukaldatu bitartean, beste herrialde batzuetako kultura eta gastronomia ezagutzeaz gain, hango emakumeen egoeraren berri izango dute parte-hartzaileek.
Halaber, euren sorterria utzi –tartean gauza asko ere bai– eta atzerrira joatera bultzatu dituzten arrazoiak azalduko dituzte geurera etorri diren atzerritarrek. Horrez gain, behin Urduñara helduta, zelan sentitu diren adieraziko dute. Ondoren, bazkaria egongo da prestatutako janariarekin eta horrek elkarren arteko hartu-emana indartzeko parada emango du.
Adik nabarmendu duenez, “Atzerritarrak askotan baztertuta daude gure gizartean. Guk beste herrialde batzuetatik etorri diren emakumeei gizarteratzen lagunduko diegu”.
Izena emateko 687818658 deitu daiteke edo adiemakumeak@gmail.com helbidera idatzi. Prezioa 3 €-koa da, bazkaria barne, eta lekuak mugatuak dira (20 pertsona).